Chi che se ricorda de quel giornalin de cara memoria ch'el vigniva publicà nei ultimi nostri ani a Pola - “El Spin - esce e punzecchia ogni sabato” - se ricorderà anche de quela rubrica intestada: <<In città cori vose che…>>. Ben, mi vojo far mia quela espression per contarve del 17° ritrovo de “l'ultima mularia de Pola (italiana!). Dunque: in città cori vose che el 17 sia un numero che el porta un fià de pegola e mi, sinceramente, ghe gavevo fato un pensierin sora; sta voltà, però, el deto se stà sfatado. Volendo cominciar con la coda del discorso, ve dirò che mejo de cussì no 'l podeva andar. Punto e a capo. Giorni bei e serade ancora mejo; ambiente che el xe el mejo fra tuti quei dei vari ani del ritrovo, signorile ( 4 stele!) e con una disponibilità, che forse la xe più nostra che dei paroni. Se sta sai ben! A parte quei che xa i ne spetava in loco, vignindo da Pola, la mularia ga comincià a venir a cadena, un drio l'altro, el venerdì. Ani indrio, el venerdì (pensando de pretender tropo) el jera solo per quei pochi che se ciamavimo “i intimi” (no stemo fantasticar); in questi ultimi ani i vol eser tuti intimi. I riva quasi tuti el venerdì. Va ben cussì; se vedi che per el futuro doveremo slungar el ritrovo e cercaremo de impostar el giovedì per i intimi. De mularia vera jerimo in 50, più 3 nostri fioi e 14 extracomunitari (mogli e mariti) = 67. Un bel numero veramente! E dir che mancava diversi dei abituali, chi per magagne, chi per nipotini e chi per…lassemo perder. Comunque li saludemo subito: Luciano Amerini, Silva Colman, Edvina Benussi (te manchi de tropo tempo), Lidia Ferro, Edda Molinari (te sarà guarida!), Pepi Piro, Checo Tromba, Maria Grazia Vodopia, Siviglia Arbelli (e allora?), Lucilla Barnè e Claudia Pecene (cossa succedi?), Nadia Benci, Regina Cimmino, Nella Galassi, Evelina Mannelli, Nino Petronio, Maria Silvi e Veniero Venier. Speremo che questo saludo el servi per farghe venir un fià de rimorso. E vai! Lassemo star i pransi, le cene, i giri e gireti, el mar (che no 'l xe proprio come el nostro) ma parlemo dei momenti clou del ritrovo. Sabato sera in ciesa de Lignano Pineta ( anche el paroco e el sagrestan i ne considera ormai de casa) una bela messa: el oficiante, Padre Germano (don Mario) Diana - oltre i novanta e come un gardelin - el frate de la mularia de Sant'Antonio a Pola, ga ricordà la figura del confratello padre Flaminio Rocchi (el frate dei esuli in patria). Ala messa ga partecipà de fato: Aldo Vallini con le letture liturgiche, Saverio Santacroce (marì de la Nella Valassi - più de ciesa de cussì) con la preghiera de l'esule, Lino Vivoda col ricordo de la mularia “andada avanti” e del nostro diretor dela 'Rena, da poco scomparso e, sopratuto, el gran maestro del coro Mario Tagliapietre che el ne ga guidà nel canto del “Va pensiero”, presentandolo ai altri fedeli come “la nostra preghiera”. Diversi oci lucidi ma, anche, una grande sodisfassion nel veder e sentir che i estranei presenti se compiaseva con noi. Basta col sacro e via col profano. Cenone de gala: serada mite e tuti in tavola in giardin, al lume de candela, in gringola, specie le signore (le nostre mule, se intende) e un complessin che ne faseva compagnia con musiche dei nostri tempi; qualchedun xe gà cimentà con quatro pasi de dansa, ma i xe andai a sconderse visin ala piscina, perché i diseva che su l'erba se sbrisava. Servisio a buffet; gavemo magnà ben e po….caffè, amaza caffè e ciacole fin tardi. Quasi quasi me dimenticavo; come sempre, i muli ghe ga fato omagio ale mule de la solita rosa scarlatta. Sto ano la jera meravigliosa anche quela; basta veder le fotografie! Domenica, a mesogiorno, bel tempo, in zona piscina el chef ne ga preparà el persuto de San Daniele come se el dovessi vigni so su una pista de acqua splash che la finissi in mar e el Souvignon delMulino delle Tolle, de la Bassa friulana. Tuti pronti per l'asalto, ma ne bloca el sior Sindaco che el ne elargise una specie de tirada de recie mascherada de promemoria per i programi del Comun. No se pol darghe torto: de tanti che semo ancora (pararia de no, ma basta solo veder quanti indirissi che go mi) pochi se vedi in giro, tuti i altri i va per i fati lori. Però, sior Sindaco, dal prossimo ano, el vien a contarnela con più tempo a disposission, magari rivando el sabato dopopranso, el dormi con noi e el torna a Trieste la domenica dopopranso. In fin dei conti, per l'età che el ga, lei el xe el più picio de noi e, anche se sindaco, el fa più parte de la mularia che de altri grupi. Domenica dopopranso, verso la fine del ritrovo, saludi, contenti sì ma coi oci lucidi. Grasie mule e muli e…. al 2005 (18°). Lunedì matina, in 14, semo andai a Pola: tempo balordo, ma un bagno almeno lo gavemo fato. Ierimo fra noi …però, Paolo, te raccomando la prossima volta. Tralasso l'elenco dei presenti, per lassar più spassio a le foto. GIORGINI